ELKARREKIN
BIZI!

Donostian belaunaldiarteko etxe kolaboratibo bat diseinatzeko eta sustatzeko prozesua

HELBURUAK

Bai herritar taldeak eta bai erakunde publiko batzuk proiektuak lantzen ari dira etxeen espazioa beste era batean planteatzea proposatzen dutenak. Sustatzen ari diren etxe ereduan, garrantzia ematen diote komunitateari eta kolektiboari bai alderdi sozialetik eta bizikidetzarenetik, bai diseinuaren, espazioen banaketaren eta arkitekturaren aldetik eta bai jabetzaren eta antolatzeko eraren aldetik. Horretaz gainera, proiektu hauen asmoa da ohiko etxebizitzaren alternatiba berritzaile bat sustatzea, eta azpimarra jartzea bai etxebizitzaren politika publikoetan eta bai asistentzia arlokoetan.

Elkarrekin Bizi proiektuaren helburu orokorrak dira etxearen eredu kolaboratibo batean sakontzea, dauden aukerak analizatzea eta gure ingurunera egokitzea horretarako tresna espezifikoak sortuz.

Helburu zehatzak

Etxe kolaboratiboaren eredua zehazteko prozesu bat garatzea.
Etxe eredu bat garatzea non protagonistak auzokideak izango baitira.
Belaunaldiarteko harremanak sustatuko dituen prozesu eta espazio bat sorraraztea.
Erakunde publikoak, enpresa espezializatuak eta komunitateko eragileak elkarrekin lan eginaraztea.
Eredua hedatzen lagunduko duten baliabideak sorraraztea.

Zehazki, eta askotariko sektoreetako profesionalekin lan eginez, irtenbideak bilatzen saiatu gara honako alor hauetan:

Juridiko-urbanistikoa.
Arkitektonikoa.
Zainketak eta komunitatea.
Bideragarritasun ekonomikoa eta finantzarioa.

Prozesu honetatik atera diren emaitzekin, asmoa da horiek oinarri gisa hartzea etorkizuneko belaunaldiarteko etxe kolaboratiboak gauzatzeko, baina konturatzen gara hori garatzeko zenbait alderdi zorroztu beharra izango dela eta are aldatu beharra proiektua martxan jarri ondotik. Asmoa da, gainera, emaitzak baliagarriak izatea etxe kolaboratiboen eta/edo belaunaldiartekoen ekimen berriak martxan jartzeko orduan.

ERAGILE INPLIKATUAK

BULTZATZAILEAK:
Elkarbidean elkartea Adinekoen bizikidetzarako egoitza eredu sozial kolaboratibo eta autogestionatu berri bat sustatzeko elkartea. Elkarbidean-ek proiektuan parte hartu du, bai hura koordinatzen eta bai bazkideen bitartez, haiek lantaldeetan sartuta..

Abaraska elkartea Erabilera lagatako etxe kooperatibo komunitarioak sustatzeko elkartea. Talde honetan ez da aintzat hartzen adin mugarik. Abaraskak proiektuan parte hartu du bazkideak lantaldeetan sartuta, baita bazkideak teknikari gisa jardunda ere, lau urtean elkarteak pilaturiko eskarmentua eta ezagutza erantsiz.

Donostiako Udala Donostiako Udalak proiektuan parte hartu du Donostia Lagunkoia Hiri Planaren bitartez; horri esker hartu dute parte udaleko Etxebizitza, Hirigintza eta Ondarea arloek, prozesuak alderdi teknikotik haien premia izan duenean. Horretaz gainera, udalak ikusi du badagoela partzela bat erabil daitekeena etxe kolaboratibo baten proiektu gisa; horrela, lanaren prozesuak esparru jakin bat edukiko luke pixkanaka-pixkanaka aplikatzen joateko.

TEKNIKARIAK Hiritik At Koop.: tokiko garapenerako aholkularitza.
LZB koop.: arkitektura eta hirigintza kooperatiba.
Juntura koop.: arkitektura, hirigintza eta prozesuen kooperatiba.
JonAnder Agirre Mikelez ARKITEKTURA: arkitektoa.
373 abokatuak: abokatu kooperatiba.
Garazi Plazaola: abokatua.
Aholku koop.: aholkularitza.
Larraitz González: ekonomista.
TaPuntu koop.: diseinu eta komunikazio zerbitzuak.
Parean Elkartea.: berdintasuna eta zaintza.

PROIEKTUAREN EZAUGARRIAK

PROPOSATURIKO EREDUAREN EZAUGARRI NAGUSIAK

Jabetza kolektiboa eta erabileraren lagapena

Etxeek lagatakoaren erregimena izango lukete; hau da, etxekoak erabiltzaile izango lirateke, ez jabe. Komunitatea antolatzeko, irabazi asmorik ez duen kooperatiba bat dago, eta beti azalera-eskubideduna da —hau da, orube baten gaineko azalera eskubidearen titularra da— eta eraikinaren jabea — eraikinaren jabetza beti kolektiboa da, eta dirurik irabazteko ez den irizpideekin kudeatzen da—. Horrela, bermatzen da higiezinen merkatuaren zirkuitu espekulatibotik kanpo gelditzen dela, eta, gainera, etxearen merkatua erregulatzen laguntzen da

Etxe eskuragarria eta egonkorra

Eskuragarria: Etxeek arrazoizko prezioa eduki behar lukete, sarrerako kuota (berreskuragarri) baten bitartez, eta hileko kuota eskuragarriekin (ez berreskuragarriak).

Egonkorra: Epe luzeko azalera eskubidearen bitartez (75 urte), bermatuko litzateke etxeen erabilera-lagapena kooperatibaren eta bazkideen artean eta prezio egonkorrarekin, alokairu kuota batekin ez bezala —izan ere, epe laburreko aldaketak izan baititzake horrek—, eta hala, komunitate egonkor eta orekatu bat sortzea mesedetzen da.

Komunitatea

Proiektuak komunitate mailako balioak ditu atxikian: komunitate proiektu sozial, parte hartzaile eta solidario bat da asmoa; eta autogestioa eta autopromozioa erabiliko lirateke; arreta zainketan eta elkarri laguntzean jarriko litzateke; eta, hala, komunitate heterogeneo baina kohesionatu bat sortuko litzateke, bere lotura komunitarioak egingo lituzkeelarik auzoarekin eta hiriarekin.

Autogestioa eraikuntza prozesuan

Eraikina egitea bera eta eraikuntzaren kudeaketa osoa kooperatibak eramango luke (baliabide eta finantzabide propioekin), eta etxebizitza eta zainketa politikekin osatuko litzateke.

Belaunaldiarteko etxea

Proiektuaren asmoa belaunaldiarteko eredua definitzea bazen, ondoko prozesuak erakutsi du zailtasun gogorrak suerta daitezkeela ez hainbeste adinagatik baizik eta etxebizitzarekiko egoera desberdinengatik (jabetasuna bai edo ez).

DOKUMENTAZIOA

Webgune honetan egindako lanaren laburpen bat irakurtzen ari zara. Zure esku jarri dugu proiektuan zehar landutako dokumentazio guztia. Era berean, txosten teknikoak jaisteko aukera ere izango duzu

ELKARREKIN BIZI!